Límtré Vírnet er íslenskt iðnfyrirtæki og starfsstöðvar þess byggja á áratuga löngum framleiðsluferlum.  Starfsfólk okkar er einnig með áratuga starfsreynslu við framleiðslu og sölu á gæðavörum fyrir byggingariðnaðinn á Íslandi.

Starfsstöðvar okkar eru á fjórum stöðum á landinu.  Höfuðstöðvar okkar eru í Borgarnesi, þar sem framleitt er valsað stál og ál til klæðninga utanhúss og innanhúss, ásamt framleiðslu á milliveggjastoðum úr stáli.  Þar eru einnig framleiddir Vírnets naglar, landsþekkt gæðavara sem og ýmsar aðrar vörur úr stáli og áli.  Í Borgarnesi eru einnig reknar þjónustueiningarnar, blikksmiðja, járnsmiðja og rafmagnsverkstæði. 

Aðal söludeild fyrirtækisins er starfrækt í Borgarnesi, en einnig erum við með söludeild fyrir loftræstivörur á starfsstöð okkar í Kópavogi, að Víkurhvarfi 8.  Einnig er að Víkurhvarfi 8 í Kópavogi starfsemi eins og innkaupadeild, fjármálastjóri og byggingadeild, sem er hönnunar- og söludeild sem veitir faglega ráðgjöf og selur lausnir fyrir húsbyggjendur límtrés- og stálgrindahúsa, ásamt öðrum tilheyrandi lausnum.

Á Flúðum er starfrækt eina íslenska límtrésverksmiðjan, þekkt fyrir gæði, áreiðanleika og góða þjónustu.  Í Reykholti í Bláskógabyggð framleiðum við Yleiningar sem eru samlokueiningar með polyurethan eða steinull sem einangrun.

Starfsfólk Límtré Vírnets kappkostar að veita viðskiptavinum sínum fljóta, góða og örugga þjónustu.  Hér á heimasíðu okkar er gott yfirlit yfir vöruval okkar og þjónustu. 

Hafðu  endilega samband ef þú telur að við getum hjálpað þér við að byggja, breyta eða bæta húsnæði þitt.